Home / சமூகம் / இந்துத்துவம் / சமஸ்கிருதத்தை அரியணை ஏற்ற துடிக்கும் பா.ச.க!

சமஸ்கிருதத்தை அரியணை ஏற்ற துடிக்கும் பா.ச.க!

2014 ஆம் ஆண்டு நாடாளுமன்றத் தேர்தலில் கார்ப்பரேட்டுகளின் விருப்பத்தின்படியும், இந்துத்துவக் கும்பலின் திட்டமிட்ட பரப்புரை உத்தியைக் கொண்டும் பாரதிய சனதா கட்சி வெற்றி பெற்றது. கார்ப்பரேட்டுகளின் ஆசி பெற்ற நரேந்திர மோடி தலைமையிலான பாரதிய சனதா அரசு பதவியேற்று ஆறு மாத காலமாகிறது.

இந்திய ஒன்றியத்தின் ஆட்சிக் கட்டிலில் இருக்கும் பாரதிய சனதா கட்சிக்கும், அதன் தலைமை அமைச்சரான நரேந்திர மோடிக்கும் இரண்டு கண்களாக இருப்பவை;;

1. இந்துத்துவ கொள்கைகளை செகுசன மக்களின் மீது திணிப்பதன் மூலம் பார்ப்பனீய ஆதிக்கத்தை நிலைநிறுத்துவது.

2. மக்களின் வாழ்வாதாரத்தையோ, எதிர்கால நலனையோ கருத்தில் கொள்ளாமல் இயற்கை வளங்களை சுரண்டிக் கொழுக்கும் கார்ப்பரேட் பெருமுதலாளிகளுக்கு வால் பிடிப்பது.

இந்துத்துவக் கொள்கைகளை இந்திய வெகுசன மக்களின் கோட்பாடாக உலகிற்கு அறிவித்துக் கொள்வதும், பார்ப்பனீய ஆதிக்கத்தை மீள் கட்டுமானம் செய்ய நாளொரு கொள்கைகளை அறிவித்துக் கொண்டிருப்பதுமே பாசிச பாரதிய சனதா அரசின் செயலாக உள்ளது.

 

  • சமூக வலைத்தளங்களில் இந்திய ஒன்றிய அரசு ஊழியர்கள் இந்தியைத் தான் பயன்படுத்த வேண்டும்.

  • பள்ளிக் கூடங்களில் சமஸ்கிருத வாரம் கொண்டாட அறிவிப்பு செய்தது.

  • ஆசிரியர் நாளை சமஸ்கிருதமயமாக்கி, ” குரு உத்சவ்” என்று அழைத்தது.

  • இந்திய தொழில்நுட்பக் கழகங்களில் அசைவ உணவுக்குத தடை.

  • இந்திய ஒன்றிய அரசு நடத்தும் கேந்திரிய வித்யாலய பள்ளிகளில், மூன்றாம் மொழிப் பாடமாக இருக்கும் ஜெர்மன் மொழியை நீக்கிவிட்டு, சமஸ்கிருதத்தை திணிக்க முற்பட்டுள்ளது.

 

என நரேந்திர மோடி தலைமயிலான பா.ச.க, ஆட்சிக்கு வந்த நாளில் இருந்து பார்ப்பனீய ஆதிக்கத்தைக் கட்டியெழுப்பும் வேலை முடுக்கிவிடப்பட்டுள்ளது.

 

சமஸ்கிருதம் கட்டாயம்:

கேந்திரிய வித்யாலய பள்ளிகளில் ஆறு முதல் எட்டாம் வகுப்பு வரை படிக்கும் மாணவர்களுக்கு மூன்றாம் மொழிப் பாடமாக சமஸ்கிருதம் கட்டாயமாக்கப்பட்டுள்ளது.

ஆங்கிலம் மற்றும் இந்தியோடு சேர்த்து ஜெர்மன் மொழி இருந்த இடத்தில் சமஸ்கிருதம் திணிக்கப்பட்டுள்ளது. ஏற்கனவே, இந்தியாவில் உள்ள தேசிய இனங்களின் மொழிகளை உதாசீனப்படுத்தி இந்தியை திணிக்கும் முயற்சிகள் நடப்பது நாம் அறிந்ததே. இப்போது, இந்தி மொழி பரவலாக உள்நுழைந்த இடங்களில், சமஸ்கிருதத்தை திணிக்கும் முயற்சியில் இறங்கியுள்ளது பாரதிய சனதா அரசு.

Cartoon 24-11-14 2
“பெருமைக்குரிய இந்துக்களின்” ஆட்சி – அசோக் சிங்கால்:

தற்போது நடைபெற்று வரும் உலக இந்துக்கள் மாநாட்டில் பேசிய விஷ்வ இந்து பரிஷத் அமைப்பின் முக்கிய தலைவர்களில் ஒருவரான அசோக் சிங்கால் பேசும் போது, ” 800 ஆண்டுகளுக்குப் பிறகு ” பெருமைக்குரிய இந்துக்கள் ” டெல்லியில் ஆட்சி செய்து கொண்டிருக்கிறார்கள். இந்துக்களின் பெருமைகளை மீட்டெடுக்க இதுவே சரியான தருணம்” என்று பேசியுள்ளார்.

மேலும் கேந்திரிய வித்யாலய பள்ளிகளில், ஜெர்மன் மொழிக்குப் பதிலாக சமஸ்கிருதம் கட்டாயமாக்கப்படுவது குறித்து அவர் கூறியதாவது, ” மேலும் பல்வேறு விடயங்களை கட்டாயமாக்க வேண்டியுள்ளது, சமஸ்கிருதம் நம்முடைய நாட்டின் மொழி! சமஸ்கிருதத்தை புறக்கணிப்பவர்கள் இந்த நாட்டையே புறக்கணிப்பவர்கள்” என்று தெரிவித்துள்ளார்.

“பெருமைக்குரிய இந்துக்கள்” என்று சொல்லும் அசோக் சிங்கால் ஆகட்டும், இந்துத்துவக் கும்பல் ஆகட்டும் தொடர்ந்து ஒரு பொய்யை சொல்லி வருகின்றனர். அது யாதெனின், இடைப்பட்ட காலத்தில் இசுலாமிய அரசர்களின் வருகைக்கு பின்புதான் இந்து மதத்தின் பாரம்பரியம், அதன் மதிப்புகள் அழிந்து போயிற்று என்று கூறி வருகின்றனர்.

இவற்றோடு சேர்த்து, ஒட்டுமொத்த இந்தியாவின் மொழியாக இருந்த சமஸ்கிருதமும் அழிக்கப்பட்டது என்னும் பரப்புரையை தொடர்ந்து செய்து வருகிறது இந்துத்துவக் கும்பல்.

ஆனால், ஆங்கிலேயர் வருகைக்கு முன் இந்தியாவில் வாழ்ந்த மக்கள் தங்களை இந்துக்கள் என்று அடையாளப்படுத்திக் கொள்ளவே இல்லை.

இவ்வளவு ஏன்?  1955-ஆம் ஆண்டு இந்துச் சட்டம் தொகுக்கப்பட்டபோது கூட, இந்தச் சட்டம் யாருக்கெல்லாம் பொருந்தும்  என்று வரையறை செய்ய முடியாமலேயே இருந்துள்ளது. இதன் காரணமாகத்தான், மதத்தால் யாரொருவர் கிறிஸ்துவராக, இசுலாமியராக, பார்சியாக, யூதராக இல்லாமல் இருக்கிறாரோ அவரே இந்து என்று எதிர்மறையாகவே விளக்கமளிக்கப்பட்டது.

“இந்துக்கள்” என்கிற அடையாளமே இல்லாதிருந்த ஒரு காலத்தை இந்துக்களின் வரலாறாகவும், பார்ப்பனர்களின் மொழியான சமஸ்கிருதம் இந்தியாவின் மொழியாக நிலை பெற்றிருந்த காலமாகவும் பொய்யாகப் பரப்புரை செய்கின்றனர்.

மதச்சார்பின்மை என்னும் கருத்தை கேலிக்குரியதாக்கி, இந்தியாவில் மத அடிப்படையிலான காழ்ப்புணர்ச்சிகள் தொடர்ந்து இருக்கும்படி செய்து அதன் மூலம் கிடைக்கும் அரசியல் ஆதாயத்தை அடைவது, அதிகாரத்தை வைத்து பார்ப்பனீய ஆதிக்கத்தை கட்டமைப்பது என்பதுதான் பாசிச பா.ச.க -வின் திட்டம்.


தமிழகத்தில் கிரிக்கெட்டும், சமஸ்கிருதமும்:

“ஜீவா” – திரைப்படம் பற்றிய எமது திறனாய்வுப் பார்வையில், தமிழ்நாடு கிரிக்கெட்டு சங்கம் என்பது முழுக்க முழுக்க பார்ப்பனீய ஆதிக்கம் நிரம்பிய ஒரு இடம் என்று திரைப்படத்தில் காட்டப்படும் உண்மையை பாராட்டியிருந்தோம். இந்தக் கட்டுரையை எழுதிக் கொண்டிருக்கும் தருணத்தில் சின்மயா மிஷன் சார்பாக சென்னையில் சமஸ்கிருதத்தில் கிரிக்கெட்டுக்கு வர்ணனை செய்யும் ஒரு போட்டி நடத்தப்பட்டுள்ளது.

இந்துத்துவ, சங் பரிவாரக் கும்பலால் நாடு முழுவதும் பல பள்ளிக் கூடங்கள் நடத்தப்படுகின்றன. அத்தகைய பள்ளிக் கூடங்களில் படிக்கும் மாணவர்களை மேற்சொன்ன போட்டியில் பங்கேற்க வைத்துள்ளனர்.

தமிழக அளவில் கிரிக்கெட் தேர்வு என்பது திறமைக்கு பதில் பூணூலை மையமாக வைத்து நடைபெறும் சூழலில், கிரிக்கெட் வர்ணனையில் சமஸ்கிருத முயற்சி என்பது பார்ப்பனீய ஆதிக்கத்தையே காட்டுகிறது.

36590713

கிரிக்கெட்டின் விளையாட்டின் மீதும், அதன் நிர்வாகக் குளறுபடிகள் மீதும்  நமக்கு ஏகப்பட்ட விமர்சனங்கள் இருக்கின்றன. ஆனால்,நாம் மறுக்கமுடியாத வகையில் கிரிக்கெட், இந்திய வெகுசன மக்களின் விளையாட்டாக உள்ளது. கிரிக்கெட் எப்படி இந்திய மக்களின் விளையாட்டாக ஆக்கப்பட்டதோ, அதே போல சமஸ்கிருதம் இங்கு பேச்சு வழக்கில்தான் உள்ளது என்பதைக் காட்டுவதற்கான முயற்சியாகவே இதை நாம் பார்க்க வேண்டும்.

ஒட்டு மொத்த இந்தியாவின் மொழியா?  சமஸ்கிருதம்!

இந்திய நாட்டின் பெருமையாகவும், கலாச்சார அடையாளமாகவும் இந்துத்துவ பா.ச.க கும்பலால் முன்னிறுத்தப்படும் சமஸ்கிருதம், ஒட்டு மொத்த இந்தியாவின் மொழியாக இருப்பதாக இவர்கள் கூறுவது உண்மையானால்,சமஸ்கிருதம் வழக்கொழிந்து, செத்துப் போக என்ன காரணம்?

இந்தியாவில் மொத்தம் 400-க்கும் அதிகமான மொழிகள் வழக்கில் உள்ளன. இவற்றில் 196 மொழிகள் அருகிவரும் மொழிகள்; 9 மொழிகள் அழிந்து போய்விட்டது. ஆனாலும், இந்த மொழிகளைப் பேசும் சிறிய மக்கள் குழுக்கள் இந்தியாவில் உள்ளனர்.

கர்நாடக மாநிலம் சிமோகாவில் உள்ள இரண்டு பார்ப்பனக் கிராமங்களைத் தவிர்த்து வேறு எங்கும் சமஸ்கிருதம் வழக்கில் இல்லை. அதுவும் பெரும்பாலும் கோவில்களில் வேதங்கள் சொல்லவும், பூசை, புனஸ்காரங்கள் செய்ய பார்ப்பனர்களால் பயன்படுத்தும் மொழியாக மட்டுமே சமஸ்கிருதம் இருந்து வந்துள்ளது.

இன்று இந்து மதத்தினராக அடையாளப்படுத்தப்படும், இந்து மதத்தைப் பின்பற்றும் மக்களிடமிருந்து சமஸ்கிருத வேதங்கள் விலக்கியே வைக்கப்பட்டுள்ளன.

உதாரணமாக, மகராஷ்டிராவில் உள்ள மகர் எனும் சாதியைச் சேர்ந்த குமுத் பாவ்டே என்னும் பெண் சமஸ்கிருதம் மொழியைக் கற்று சிறப்பான முறையில் தேர்ச்சி பெற்றிருந்த போதும், வேலை வாய்ப்போ, ஏனைய சமஸ்கிருத பண்டிதர்கள் பெறும் மரியாதையோ தான் பெறவில்லை என்பதை தன்னுடைய புத்தகத்தில் பதிவு செய்துள்ளார்.

தமிழக அரசால் கொண்டுவரப்பட்ட “அனைத்து சாதியினரும் அர்ச்சகராகும் திட்டம்” மூலம்  சமஸ்கிருத வேதங்களை பயின்று, தேர்ச்சி பெற்ற 200-க்கும் மேற்பட்ட பார்ப்பனர் அல்லாதவர்கள், கோவில்களில் பூசைகள் செய்ய அனுமதிக்கப்படக் கூடாது என்று உச்ச் நீதிமன்றத்தில் வழக்கு தாக்கல் செய்யப்பட்டுள்ளது.

இந்த செயல்களை எல்லாம் ஒரு புறம் ஊக்குவித்து கொண்டே, மறுபுறம் சமஸ்கிருதத்தை இந்தியாவின் அடையாளமாக, இந்தியர்களின் மொழியாக பரப்புரை செய்கிறது பார்ப்பனீயக் கும்பல்.

 

தண்டனை வழங்கும் “மனு தர்மம்”!

பார்ப்பனீய வேதங்களின் மொழியாக மட்டுமே இருந்து வந்த சமஸ்கிருத மொழியை பார்ப்பனர்களைத் தவிர ஏனைய சாதியினர் கற்றுக் கொள்ளக் கூடாது என்று கூறுகிறது மனுதர்மம். வர்ணாசிரமக் கோட்பாட்டைக் கொடுத்த சாஸ்திர நூலான மனுதர்மம், சமஸ்கிருத மொழியில் சொல்லப்படும் வேதங்களை, மந்திரங்களை கேட்கவோ, கற்கவோ சூத்திரர்களுக்கும், பெண்களுக்கும் அனுமதி மறுக்கிறது. மனுவின் இந்தச் சட்டத்தை மீறுபவர்களுக்கு பின்வரும் தண்டனைகளை கொடுக்கச் சொல்கிறது மனுதர்மம்.

சமஸ்கிருத மொழியில் உள்ள வேதங்களையோ, மந்திரங்களையோ ஒரு சூத்திரன்,

  • தன் மனதில் இருத்திக் கொள்ளும் எண்ணத்தில் கேட்பானேயானால்,காய்ச்சிய எக்கினை அவனது காதில் ஊற்ற வேண்டும்.

  • வேத மந்திரங்களை தனது வாயால் உச்சரிக்க செய்தால் அவனது நாவை அறுத்து எடுத்துவிட வேண்டும்.

  • வேத, மந்திரங்களை கற்று அவற்றில் சிறந்து விளங்குவானாகின், அவன் உடலைத் துண்டு துண்டாக வெட்டியெறிய வேண்டும்.

இவ்வாறு சாதிய சமூகத்தை நியாயப்படுத்தும் மனுதர்மம், பெண்களை மேலும் உரிமைகள் அற்றவர்களாக, கீழானவர்களாக கருதும்படி சட்டங்களைக் கொண்டுள்ளது.

வேத, மந்திரங்களை கற்கவோ, பயன்படுத்தவோ பெண்களுக்கு உரிமை முற்றிலும் மறுக்கப்பட்டு உள்ளது. பெண்கள் ஆண்களைப் போன்று பலமானவர்கள் அல்லர், பொய்யைப் போன்று மாசு வடிவினர் என்று நிறுவப்பட்டுள்ளதாக மனுதர்மம் கூறுகிறது.

சாதிய சமூகத்தை கட்டிக் காக்கும், பெண்களை ஒடுக்கும்  சட்டங்களை வழங்கிய மனுவை, “உலகின் முதலாவதும், மாபெரும் சட்ட வல்லுநர்” என்று பாராட்டுகிறார் ஆர்.எஸ்.எஸ்-சின் இந்துத்துவக் கோட்பாடுகளை வகுத்துக் கொடுத்த கோல்வால்கர்.

TH22_Sanskrit_C_TH_2216078e
கல்வித்துறையில் பார்ப்பனீயமும், சமஸ்கிருதம்:

பாரதிய சனதா கட்சி 1999-ல் இருந்து 2004 வரை ஆட்சியில் இருந்த போது, வரலாற்று பாடப் புத்தகங்களை தங்களுடைய பரப்புரைத் திட்டத்திற்கு ஏற்ற வகையில் புரட்டும் வேலையைச் செய்தது. இன்றும் வரலாற்று துறையில் இந்துத்துவ கோட்பாடுகளை ஏற்றுக் கொண்ட ஆசிரியர்களைக் கொண்டு அதே பணியில் ஈடுபட்டு வருகிறது.

வரலாற்றைப் புரட்டுவதன் மூலம், தங்களுடைய திட்டங்களை நிறைவேற்றி இந்தியா என்பது வர்ணாசிரமக் கோட்பாட்டை ஏற்றுக் கொண்ட இந்துக்களின் தேசியமாக கட்டமைக்கும் பணியைச் செய்கிறது. இதற்கு, தினாநாத் பந்த்ரா போன்ற பார்பனீயக் கல்வியாளர்களை முக்கிய பொறுப்புகளில் அமர்த்துகிறது ஆட்சியில் இருக்கும் பாரதீய சனதா அரசு.

கல்வித்துறையில் பார்ப்பனீய ஆதிக்கத்தை ஏன் ஒழிக்க வேண்டும் என்பதைப் பற்றி தந்தை பெரியார் பின்வருமாறு கூறுகிறார்,

“கல்வியிலாக்காவில் எப்பொழுது பார்ப்பன ஆதிக்கம் ஒழிகிறதோ அப்பொழுதுதான் கல்வியிலிருந்து பார்ப்பனீயத்தை ஒழிக்க முடியும். இல்லாத வரையில் இன்னும் பன்னூறாண்டு களுக்குப் பார்ப்பனீயம் ஆதிக்கம் செலுத்தும் என்பதில் அய்யமில்லை”.

இதற்காககத்தான் செத்த மொழிக்கு உயிர் கொடுக்கும் வேலையை கல்வித் துறையில் தொடர்ந்து செய்து வருகிறது பாசிச பா.ச.க-வும், அதன் தலைமைப் பீடமான ஆர்.எஸ்.எஸ் அமைப்பும்.

பார்ப்பனர்கள் மட்டுமே பயன்படுத்திய சமஸ்கிருதம்; திராவிட, வடகிழக்கு மொழிகளுக்கு சற்றும் தொடர்பில்லாத சமஸ்கிருதம்; ஏனைய சூத்திர சாதி மக்களிடமிருந்தும், பெண்களிடமிருந்தும் விலக்கி வைக்கப்பட்ட சமஸ்கிருதம்;இன்று பேச்சு வழக்கில் இல்லாத சமஸ்கிருதம் ஒட்டுமொத்த இந்திய மக்களின் மொழியாக அடையாளப்படுத்தபடுவது என்பது பார்ப்பனீய மேலாதிக்கத்தை கட்டியெழுப்ப விரும்பும் இந்துத்துவக் கும்பலின் திட்டமே அன்றி வேறல்ல.

இந்தியா முழுக்க தலைவிரித்தாடும் இந்துத்துவக் கும்பலின் கொட்டம் அடக்க முற்போக்கு ஆற்றல்கள் இணைந்து செயல்பட வேண்டியது காலத்தின் கட்டாயம்.

 

கதிரவன்
இளந்தமிழகம் இயக்கம்

 

தரவுகள்:

http://www.frontierweekly.com/archive/vol-number/vol/vol-44-2011-12/vol-44-11-14/sansktit-44-11-14.pdf

http://www.thehindu.com/features/downtown/students-took-part-in-cricket-commentary-competition-in-sanskrit-organised-by-chinmaya-mission/article6624887.ece

http://kafila.org/2014/10/24/sanskrit-and-language-politics-then-and-now-muruganandham/

http://www.outlookindia.com/news/article/Proud-Hindus-Have-Come-to-Rule-Delhi-After-800-Years-VHP/868993

சங் பரிவாரின் சதி வரலாறு – விடுதலை இராசேந்திரன்.

மோடி அரசாங்கம் – சீதாரம் யெச்சூரி.

 

About கதிரவன்

Leave a Reply

Your email address will not be published. Required fields are marked *

*